Uumassusillit sananeqaataasigut kingornuttagaasunik isumalluutinik atuinermi katersinerit, toqqorsinerit, nalunaarsuinerit, piginnittuulernerit, nuussinerit aamma uumassusillit sananeqaataasigut isumalluutit Kalaallit Nunaanniittut Kalaalillu Nunaanneersut suugaluartut ilaapput. Kalaallit Nunaanni uumassusillit sananeqaataasigut kingornuttagaasunik isumalluutit atornissaannik kissaateqartut tamarmik tamatumunnga akuersissut pillugu qinnuteqaateqassapput Tamatuma saniatigut atuinermi isumalluutinik katersiffigineqartoq tunngavigalugu ilisimatusarnerit ineriartortitsinerillu ilaatinneqarput.  Isumalluullu tunngavigalugu piginnittuulertarneq pissarsiat avitseqatigiiffiginissaat pillugu isumaqatigiissusiorsimanissaq piumasaqaammut ilaavoq.

Kalaallit Nunaanni uumassusillit sananeqataasigut kingornuttagaasunik isumalluutit atornissaannut akuersissut pillugu qinnuteqartoqarpat qinnuteqaatip imarisai nalilersuiffigineqassapput, qinnuteqaammilu atortussat akuersissutip tunniutinnginnerani naalakkersuisoqarfinnut attuumassutilinnut tusarniutigineqassapput.  Akuersissummik piginnittoq atortussanik katersorneqartunik imaluunniit taakkunani angusanik iluanaarniutigalugu atuinissamik kissaateqarsimappat akuersissummik piginnittup imaluunniit taassuma suliffeqarfiutaata ingerlatsiffiataalu aamma Namminersorlutik Oqartussat akornanni pissarsiat avittarnissaannut isumaqatigiissusiortoqassaaq.  (Mutually Agreed Terms)

Kalaallit Nunaanni uumassusillit sananeqataasaasigut kingornuttagaasunik isumalluutit atornissaat pillugu isumaqatigiissutigineqartoq inatsisitigut aalajangersagaavoq.  "Uumassusillit sananeqaataasigut kingornuttagaasunik isumalluutit tamatumunngalu atatillugu suliniutit pillugit Inatsisartut inatsisaat nr. 3, 3. juni 2016-imeersoq". Tassani uumassusillit sananeqaataasigut kingornuttagaasunik isumalluutini pitsaaqutit atornissaannut periarfissaqartitsineq agguaasarnerlu malittarisassiorneqarput.