Uumassusillit sananeqaataasigut kingornuttagaasunik isumalluutit atornissaat pillugu inatsiseqartitsinerit uani atuarsinnaavatit. 

Inatsisit Nagoya-protokollimi tunngavigineqartut malillugit ilusilersugaapput, tunngavigineqartunilu uumassusillit sananeqaataasigut kingornuttagaasunik isumalluutinik suliaqarsinnaaneq kiisalu kingornatigut pitsaaqutit atuinermi pilersut naammaginartumik eqqortumillu agguataarnissaat qulakkeerneqarput.  Uumassusillit sananeqaataasigut kingornuttagaasunik isumalluutit atuiffigineranni pissarsiat ilaasa Kalaallit Nunaanni naammattumik pigineqalertarnissaat kalaallit inatsiseqartitsineranni aamma siunertaralugu qulakkeerniagassaavoq.

Pissarsianik agguataarinermi pitsaaqutit aningaasanut aningaasaanngitsunullu tunngasinnaapput, tamakkulu immikkoortillugit Namminersorlutik Oqartussat qinnuteqartullu akornanni isumaqatiginninniutigineqassapput.  Pissarsianik agguataarinermi akiliutigineqartartut, killiffinnut akiliuteqartarnerit, ilisimasanik avitseqatigiittarnerit ilinniarnerillu, ilinniartitsinerit assigisaallu ilaasinnaapput.

Namminersorlutik Oqartussat kisimiillutik oqartussaapput uumassusillit sananeqaataasigut kingornuttagaasunik Kalaallit Nunaata isumalluutaanut, allallu periarfissittarnissaannut Kalaallit Nunaata isumalluutaanit uumassusilinnit sananeqaatit kingornuttagaasut katersornissaannut iluaqutiginissaannullu, tamatumunngalu aalajangersaanissanut, isumaqatigiissuteqarsinnaanernullu.

Uumassusillit sananeqataasigut kingornuttagaasunik Kalaallit Nunaanneersunik atuineq, apeqqutaanani atuineq Kalaallit Nunaanni avataaniluunniit pinersoq, pisinnaanngilaq atuinissamut akuersissummik Naalakkersuisut tunniussisimatinnagit.

Naalakkersuisut pisinnaatitaaffimmik piginnittup akissarsianik Namminersorlutik Oqartussanut akiliuteqartarnissaa pillugu atuinissamut akuersissummik pigisalimmut piumasaqaatinik aalajangersaasinnaapput.

Akuersissummik pigisaqartut, isumaqatigiissuteqaqataasut aamma allat Inatsisartut inatsisaanni aalajangersakkanut attuumassuteqartut suliap pisortani ingerlanneqarneranut, allatulluunniit pisortat suliaqarnerannut aamma pisortat ingerlatsinerannut aningaasartuutinik akiliisussaapput. Akiliuteqartitsineq akitsuutitut imaluunniit aningaasartuutaasunik matussusiinikkut akilersinneqarsinnaavoq. Akiliinnissaq akiliutigineqartutut imaluunniit aningaasartuutinik utertitsinertut akilersinniarneqarsinnaavoq.

Uumassusillit sananeqataasigut kingornuttagaasunik isumalluutit Kalaallit Nunaanneersut imaluunniit tamakku tunngavigalugit misissuiffiginerat imaluunniit ilisimatusarfiginerat pillugit angusanik saqqummersitsisoqarsimappat imaluunniit tamanut saqqummiussisoqarpat saqqummersitsinerup imaluunniit tamanut saqqummiussinerup kingornagut saqqummersitsineq imaluunniit tamanut saqqummiussineq pillugit Naalakkersuisunut ilisimatitsisarnissaq piumasaqaataavoq.

Akiliisitaasussanngortitaasinnaavoq:

• Uumassusillit sananeqaataasigut kingornuttagaasunik isumalluutinik tamatumunnga akuersissutitaqanngitsumik isumaqatigiissutitaqanngitsumilluunniit iluaquteqartumut, akuersissuteqartoqarnissaanik inatsit una naapertorlugu piumasaqartoqarsimappat.

• Inatsisartut inatsisaat naapertorlugu akuersissuteqarnermut imaluunniit iluanaarutinik avitseqatigiinnissamut isumaqatigiissummik Inatsisartut inatsisaanni aalajangersarneqarsimasunik unioqqutitsisumut, imaluunniit Inatsisartut inatsisaanni aalajangersakkat tunngavigalugit aalajangersarneqarsimasunik unioqqutitsisumut.

• Eqqunngitsunik imaluunniit paatsiveerussaataasunik paasissutissiisumut, imaluunniit paasissutissanik nipangiussisumut, pisortat Inatsisartut inatsisaat naapertorlugu imaluunniit Inatsisartut inatsisaanni aalajangersakkat atugassarititaassulluunniit naapertorlugit pisassarisaannik tunniussinngitsumut.

• Inatsisartut inatsisaat naapertorlugu imaluunniit Inatsisartut inatsisaanni aalajangersakkat naapertorlugit peqqussutaasunik malinninngitsumut.

Naalakkersuisut uumassusillit sananeqaataasigut kingornuttagaasunik isumalluutinik iluaquteqarnissamut akuersissutitaqanngitsumik imaluunniit iluaquteqarnissamut akuersissummi aalajangersakkanik imaluunniit iluanaarutinik avitseqatigiittarnissamut isumaqatigiissumik imaluunniit Inatsisartut inatsisaanni aalajangersakkanik allanik saneqqutsilluni pissarsiarineqarsimasunik arsaarinnissuteqarsinnaapput.

Naalakkersuisut ersarinnerusunik atugassarititaasunik aalajangersaasinnaapput, taarsiissuteqarnissamut imaluunniit pissarsiassanut takussaanngitsunit pisunut tunngasumik akuersissutip arsaarinnissutigineqarsinnaanerannut allatigullu, uumassusillit sananeqaataasigut kingornuttagaasunik isumalluutinut iluaqutissarsianut tunngatillugu, iluanaarutinik avitseqatigiittarnermut Naalakkersuisunut isumaqatigiissuteqarani pissarsianut tunngatillugu,  imaluunniit Naalakkersuisunut iluanaarutinik avitseqatigiittarnissamut isumaqatigiissummut akerliusumik pissarsianut tunngatillugu.